Toshkentda Oʻzbekiston Digital Inclusion Project doirasidagi AI & ML yoʻnalishi bitiruvchilarini tabriklash marosimi boʻlib oʻtdi.
Loyiha Raqamli texnologiyalar vazirligi, Jahon banki va IT Park koʻmagida amalga oshirilmoqda.
Bitiruvchilar oldida LavoroSolutions kadrlar kompaniyasi direktori Darya Shamova soʻzga chiqdi. U ushbu tadbir katta tarixning bir qismi ekanligini taʼkidladi: bir vaqtning oʻzida Samarqandda (Cloud Engineering), Namanganda (2D/3D animatsiya) va Fargʻonada (GameDev) ham oʻqish yakunlanmoqda. Toʻrt hudud, toʻrt yoʻnalish, bundan toʻrt oy avval noldan boshlagan yuzlab yoshlar — bugun ularning har birida portfolio va real loyihalar mavjud.
Oʻzbekiston mehnat bozori boʻyicha ekspert sifatida Darya bozor voqeligini ochiq aytdi: AI & ML — eng raqobatbardosh va tez oʻzgaruvchan sohalardan biri. Loyihadan olinadigan asosiy koʻnikma — uzluksiz oʻrganish qobiliyati. Kompaniyalar shunchaki «aytishniklar» emas, balki AI ni biznes-jarayonlarga integratsiya qila oladigan mutaxassislarni qidirmoqda. U bitiruvchini talabgir qiladigan uchta narsani ajratib koʻrsatdi: portfolio, soft skills va networking. Hakatonlar, mitaplar, maqolalar, GitHub — bularning barchasi shaxsiy brendni rivojlantirishga xizmat qiladi.
LavoroSolutions direktori IT sohasidagi karyera toʻgʻri chiziq emas, balki zigzag ekanligini taʼkidladi. U junior lavozimlar, stajirovkalar, frilans va open-source loyihalarda ishtirok etish orqali quriladi va baʼzan yuqoriga sakrash uchun bir qadam orqaga chekinishga toʻgʻri keladi. Moslashuvchanlik — kasbiy rivojlanishning asosiy koʻnikmalaridan biri.
Uzbekistan Digital Inclusion Project mamlakatning turli hududlaridagi yoshlarga zamonaviy bilimlarga kirish imkoniyatini berish uchun yaratilgan. Barcha bitiruvchilarga muvaffaqiyat tilaymiz va ishonchimiz komil: ularning tarixi endigina boshlanmoqda.
